Latest News

મુખ્યમંત્રીએ શ્રી સ્વામિનારાયણ મલ્ટિ સ્પેશ્યાલિટી હોસ્પિટલ-વડતાલ ખાતેના ઓક્સિજન પ્લાન્ટનું ઇ-લોકાર્પણ કર્યું

• Tags
• Hospital
• PSA plants
• Vadtal

• મુખ્યમંત્રીશ્રી :ગુજરાતે હવામાંથી ઓક્સિજન બનાવવાના PSA પ્લાન્ટસ સ્થાપીને ૩૦૦ ટન ઓક્સિજન મેળવી ઓક્સિજન માંગમાં પગભર બનવાની દિશા લીધી છે
• કોરોના કાળમાં ઓક્સિજનની જરૂરિયાત પૂરી કરવાના રાજ્ય સરકારના પ્રયાસોમાં ધાર્મિક સંસ્થાઓનો સહયોગ પ્રસંશનીય છે
• મુખ્ય મંત્રીશ્રીની અપિલના પ્રતિસાદ રૂપે હોસ્પિટલમાં વધુ એક પ્લાન્ટ માટે રૂા.૨૫ લાખની જાહેરાત

મુખ્યમંત્રીશ્રી વિજયભાઇ રૂપાણીએ રાકેશ પ્રસાદ મહારાજની પ્રેરણાથી  વડતાલ સ્વામી નારાયણ ધામ દ્વારા કોરોનાના કપરા કાળમાં થઈ રહેલ  સમાજસેવા સહિત આરોગ્ય સેવાના કાર્યોના ભાગ રૂપે સ્થાપિત ઓકસીજન  પ્લાન્ટ નું લોકાર્પણ કર્યું હતું.

મુખ્યમંત્રીશ્રીએ ગાંધીનગરથી વીડિયો કોન્ફરન્સ દ્વારા આ લોકાર્પણ કરતા કહ્યું કે, લીકવીડ ઓક્સિજનની મર્યાદાઓ સામે હવે હવામાંથી સીધો ઓક્સિજન મેળવવાના પ્લાન્ટસ રાજ્યમાં સ્થાપીને ૩૦૦ ટન PSA ઓક્સિજન મેળવી પગભર  બનવાની દિશામાં આપણે આગળ વધી રહ્યા છીએ.

શ્રી વિજયભાઇ રૂપાણીએ જણાવ્યું કે, રાજ્ય સરકાર દ્વારા ઓક્સિજન ઉત્પાદન ના  કાર્યમાં વડતાલ સહિત અન્ય ધાર્મિક – સામાજિક  સેવાભાવી  સંસ્થાઓ,અમૂલ,બનાસ ડેરી ઉપરાંત એન.આર.આઇ  પણ સમયની માંગને અનુસરીને જોડાયા છે તે અભિનંદન પાત્ર છે.

મુખ્યમંત્રીશ્રીએ ઉમેર્યું  કે, કોરોના કાળમાં વડતાલ મંદિર દ્વારા ઓક્સિજન પ્લાન્ટ અર્પણ કરીને આ સેવા પરંપરા વધુ ઉજ્જવળ કરી છે.

તેમણે ઉમેર્યુ કે, ગુજરાતે કોરોનાની પ્રથમ લહેરમાં સફળતાપૂર્વક સંક્રમણ નિયંત્રણ કર્યુ હતું બીજી લહેરને પણ એ જ આક્રમકતાથી નિયંત્રણમાં લાવ્યા છીયે. હવે તજજ્ઞો જ્યારે ત્રીજી લહેરની સંભાવના દર્શાવે છે ત્યારે એના માટે પણ ગુજરાત  સંપૂર્ણ સજ્જ છે.

મુખ્યમંત્રીશ્રી વિજય રૂપાણીએ શ્રી સ્વામિનારાયણ મલ્ટિ સ્પેશ્યાલિટી હોસ્પિટલ- વડતાલ ખાતેના નવીન  ઓક્સિજન પ્લાન્ટનું ગાંધીનગરથી ઇ-લોકાર્પણ કર્યું હતું.

આ ઈ- લોકાર્પણ પ્રસંગે  વડતાલ ખાતે પરમ પૂજ્ય ૧૦૦૮ આચાર્યશ્રી રાકેશ પ્રસાદજી મહારાજ, સાંસદ શ્રી દેવુસિંહ ચૌહાણ, ધારાસભ્ય અને વિધાનસભાના મુખ્ય દંડક શ્રી પંકજભાઈ દેસાઈ, જિલ્લા ભાજપ પ્રમુખ – ધારાસભ્યશ્રી અર્જુન સિંહ ચૌહાણ,ખેડાના પૂર્વ  સહિત પૂજ્ય સંતોશ્રીઓ ઉપસ્થિત રહ્યા હતા.

મુખ્ય મંત્રીએ આ હોસ્પિટલમાં વધુ એક ઓક્સિજન પ્લાન્ટ સ્થાપવાની અપીલ કરી હતી. તેના પ્રતિસાદરૂપે આજ હોસ્પિટલ ખાતે બીજા ૫૦ બેડના ઓક્સિજન પ્લાન્ટની જાહેરાત કરવામાં આવી હતી.

બીજા ઓક્સિજન પ્લાન્ટ માટે હોસ્પીટલના પ્રમુખશ્રી ધનજીભાઈ દ્વારા રૂપિયા ૧૫ લાખ, મુખ્ય દંડક પંકજભાઈ દેસાઈ દ્વારા ૧૦ લાખ તથા સાંસદ શ્રી દેવુસિંહ ચૌહાણ દ્વારા રૂપિયા ૩૫ લાખની અદ્યતન એમ્બ્યુલન્સ ફાળવવાની જાહેરાત કરવામાં આવી હતી.

મુખ્ય મંત્રીશ્રીએ  જણાવ્યું કે કોરોનાથી બચવા રસીકરણ રામબાણ ઈલાજ છે ત્યારે સૌ કોરોના રસી લઇ સુરક્ષા કવચ મેળવે તે જરૂરી છે.હાલમાં  રાજ્યમાં ૧૮ થી ૪૪ વય જૂથ અને ૪૫ ઉપરની વયના જૂથના લોકોનું રસીકરણ થઈ રહ્યું છે. વડતાલ ધામ અને તેમની સમગ્ર ટીમ સરકારની રસીકરણ ઝુંબેશમાં સહયોગી બની સમાજના  યુવાઓ અને વયો વૃદ્ધોનું સો ટકા રસીકરણ થાય તે માટેના પ્રયાસો આદરે તે ખૂબ જ આવશ્યક છે.

રાજયમાં કોરોના સંક્રમિતોનો રિકવરી રેટ ૯૬ ટકા છે,જ્યારે કોરોના કેસો પણ ઘટોડો થતાં ૧૦૦૦ થી નીચે આવ્યા છે તેમ તેમણે ઉમેર્યું હતું.

આ પ્રસંગે શ્રી  રાકેશ પ્રસાદ મહારાજે આશીર્વચન આપતાં વડતાલ ધામ દ્વારા કોરોના કાળમાં કરવામાં આવેલ સમાજ સેવાની વિસ્તૃત વિગતો આપી હતી.  આ પ્રસંગે સંતો  ઉપસ્થિત રહ્યા હતા.

Source: Information Department, Gujarat